A ENCICLOPEDIA.

                     

                   A  E N C I C L O P E D I A

Tiña pensado ler tamén,a Enciclopedia A FONTE enteiriña, palabra por palabriña, dende a: A á Z , ler sempre nela, só nela. Por iso comprou plástico adhesivo para forrala en condicións e tamén un atril de madeira de castaño en Santiago de Compostela , un día de choiva pedra, iso está claro, mentres o proxenitor marcaba vacas J.L. coa tesoira no mercado de Salgueiriños.

 E despois veu no tren a tarde enteira, falando do Xapón polo menos cun veciño de Cuspedriños de Arriba, que son os que sempre ganan: “ Chegou Fortunato votade a barca “. “ Chegou Fortunato ou así”. Si porque  a Rudesinda a defensa estorbo de Cuspedriños de Baixo, metéronlle unha malleira co galo de galar, estando a eito galando. E despois, veu correndo, mellor dito facendo eses cun chintógeno de escorrentar as pegas que lle chaman taramela, que se fai dunha lata de bonito ou sardiñas en escabeche. Que ben, ler unha enciclopedia é unha recomendación de J.L. Borges, ou de D. Ferrín camioneiro e ao mellor pódese meter toda a enciclopedia na cabeza e ser moi lista. Máis lista ca todos os escritores galegos de todos os tempos. Con soio meter a Fonte na materia gris, a ver quen lle pon reparos ou atrancos.....

Por iso ao baixar do tren na Estación da Portela, non escorregou , na casca dun plátano e meteuse polo atallo e saíu ao serradoiro na curva de Vilanova, onde obrou casa Xosé da Rega. Así de simple, basta que Rudesinda desexe o saber, e xa ten a intención de pasar o inverno na Porriña lendo noite e día sen descanso na enciclopedia. E se cadra , aprende que: Li Po, Li Tai Po , ou Li Tai Pen , é un poeta chino da dinastía Tang, considerado coma o máis grande dos poetas asiáticos, cuxos versos son aínda populares en China. E que morreu afogado. E a defensa vasoira do equipo líder de Trasmundi, érguese de diante do atril con ganas de facer pis, para o control antidopaxe. E despois seguiu lendo: litar, liteira, literal, literario, literata, literatura. Mandón ,mando, comando. ¡ Cántas cousas se aprendían ! ¡ Mi madriña !.

 Á xogadora, divertida xogadora creada por D.X.Cabana,  pasóuselle o inverno voando e pola primavera, xa se dou a coñecer coma unha poetisa lirofora, que significa: poetisa porta lira, e espallou aos catro ventos composicións tipo esta:

 “ Hai Porriña , hai Porriña / todos teñen televisión en color / e ningún ten libros que se diga de modo/ tenos todos o fillo do tratante/ ¿Será por iso deus meu ? ¿ Será por iso precisamente?/ ¿ Será por iso.....?/”.

 E despois, en plan parodia improvisada, aínda dixo: “Galicia, Galicia , que verde,verde ledicia/. Chove, chove na casa do pobre/, e no meu corazón tamén chove/. Hai que estarricar os montes e endereitar os ríos/ para que isto sexa outra cousa./¿Ou non hai que facer nada desto?/ Non,non,non hai que facelo / e hai que quererte feiticeira e máxica como es/ Galicia Atlántica, Galicia nai e pai / verde, verde ledicia Galicia”.

  Pero moito coidado comigo, seguía dicindo Rudesinda en Castelán: “ La enciclopedia es toda mía y al leerla, como la leí, durante todo este invierno , ahora soy la más lista de todos los escritores de Tagen Ata”. Que aquí hai moito saramago nas veigas. Certa confusión nas raias e nas estirpes. E os cervos nas torres, están trabucando as pombas da Porriña.

Son moitas follas para un só piorno, nin sequera un de curato maior pode albergar tanta sabedoría. Rudesinda non quere entrar a trapos vermellos de toureo, pero unha balsa de pedra , só pode flotar en Lanzarote, e aquí plántase un pexegueiro e que chova..... hai que apostar por un bilingüismo pacífico e enriquecedor, as linguas coma produtos espirituais que son deben ser respectadas, protexidas e alentadas.Expresarse en calquera lingua do mundo e facer posible a diversidade na que mama a liberdade de autoafirmación e o respecto aos demais. De momento Rudesinda a futbolista do Cuspedriños de Arriba, lectora avantaxada da enciclopedia a Fonte todo o inverno pasado , di que : Li Po, Li Tai Po ou Li Tai Pen:tal,tal,tal.Polo tanto á vista desto: a Biblia en pasta ¡Zumacalarregui! por palabro,claro...e punto final.