ATENTADO EN BARRO

 

Acabo de ler no Diario de Pontevedra o atentado levado a cabo contra a cooperativa de viño Moraima. Consonte puiden entender cortaron 900 cepas de viño albariño por valor de 100.000 euros con nocturnidade e aleivosía. Falan de vinganza...cóstame entender o que pode haber en cabezas capaces de facer algo así...e tampouco é cousa miña...supoño que a garda civil fará as indagacións pertinentes vendo o contido das cámaras de seguridade que custodian as viñas e farán todo o posible por atrapar a delincuentes tan furiosos...

Como sabedes defendo a auga como bebida por excelencia e non son favorable a festas de exaltación deste tipo de produtos alcohólicos pola capacidade que teñen de alterar os sentidos e crear hábitos nada saudables...pero claro, cortar cepas dun brazo de gordas e acabar co medio de vida de persoas traballadoras non ten colledeiro...o que fai, ou os que fan iso deben ser castigados con todo o peso das leis ademais de indemnizar aos prexudicados segundo a taxación dos peritos entendidos na materia...isto en termos legais...en termos morais, o asunto risca no atentado e no asasinato vexetal de cepas produtivas ausentes das leas humanas, pero sacrificadas por unha banda de depredadores nocturnos, que pon os pelos de punta.

Estábamos no bar Caldas de Caldas de Reis degustando unha hamburguesa mentres a selección feminina de fútbol lle gañaba á colombiana nos penaltis clasificándose así para seme finais dentro das olimpíadas de París e lin tan triste noticia...eu quero para Barro e para as súas xentes sempre o mellor e noticias deste signo énchenme de carraxe...non sei ser doutra maneira...Sábado 3 de agosto do ano 2024.